काठमाण्डौ – कोरोना भाइरसको प्रभावले भारतको दिल्लीका सबै प्राथमिक विद्यालयहरु बन्द भएका छन् । दिल्लीका शिक्षामन्त्री मनिष सिसोदियाका अनुसार मार्च ३१ सम्मका लागि दिल्लीका सबै प्राथमिक विद्यालय बन्द गरिएको हो ।

यस्तै भारतले विद्युतीय हाजिरीमा पनि प्रतिबन्ध लगाएको छ । सबैले एकैठाउँमा औंठाछाप मार्फत हाजिरी गर्दा संक्रमण सर्न सक्ने भन्दै भारतले विद्युतीय हाजिरीमा रोक लगाएको हो ।

भारतमा अहिलेसम्म कोरोना भाइरसबाट ३० जनालाई संक्रमण भएको छ । सङ्क्रमण भएकामध्ये २७ जनाको उपचार भैरहेको छ भने ३ जना निको भएर घर फर्किएका छन् ।

विश्वभर फैलिएको कोरोना भाOरस कोभिड-१९ का कारण अहिलेसम्म ३ हजार ३ सय ४ जनाको ज्यान गैसकेको छ । सङ्क्रमितको संख्या ९६ हजार  २ सय ७३ पुगेको छ । ५३ हजार ९ सय व्यक्ति निको भएर घर फर्किएका छन् ।

सबैभन्दा धेरै चीनमा ३ हजार ३० जनाको यो भाइरसका कारण ज्यान गैसकेको छ । बिहीबार मात्रै चीनमा ३२ जनाको ज्यान गएको चिनियाँ सञ्चारमाध्यमले जनाएका छन् ।