उद्योगीले मागेको सहुलियत बैंकले दिन नसक्ने, ऋणको ब्याज घटाए निक्षेपकर्ता मारमा पर्छन् : बैंकर्स

 

विश्व कोरोना भाइरस (कोभिड–१९) को त्रासमा छ । सम्पूर्ण क्षेत्र प्रभावित हुँदा यसले विश्व अर्थतन्त्रमा मन्दी ल्याउन सक्ने खतरा बढेर गएको छ ।

विभिन्न देशले राहतका प्याकेज घोषणा गरेका छन् । बुधबार मात्र श्रीलंकाले ऋणको ब्याज ६ महिनासम्म नउठाउन बैंकहरुलाई अपील नै गरेको छ ।

 

युएईले पनि बैंकहरुलाई सहुलियत दिन भनेको छ । यहीबीच नेपालको नीति क्षेत्रले पनि बैंकहरुले ब्याजदर घटाउनुपर्ने, ऋणको ब्याज तिर्ने समय बढाउनु पर्ने माग सरकारसँग राखेको छ ।

यता सरकारले विशेष प्याकेज मार्फत सहुलियत प्रदान गराउने आश्वासन उद्योगी व्यवसायीलाई दिएको छ । यद्यपि, यसका लागि ठोस कदम भने चालिसकेको छैन ।

तर नबिल बैंकका कार्यकारी निर्देशन अनिल केशरी शाह बैंकले ऋणको ब्याज घटाएर मात्र समस्याको समाधान नहुने तर्क गर्छन् । उनले भने, ‘पूरा बैंकिङ क्षेत्रमा ५÷६ लाख व्यक्ति वा संस्था ऋणी होलान् तर निक्षेकर्ता त करोडौ छन् । कतिपयले निक्षेपको ब्याजबाटै घर चलाउनुपर्ने हन्छ । हामी एउटा समूहलाई मात्र हेर्न सक्दैनौ‌ं, पूरा समूहलाई हेर्नुपर्ने हुन्छ ।’

यद्यपि, अर्थमन्त्रालय र राष्ट्र बैंकबाट निर्देशन आएको अवस्थामा आफूहरु पालना गर्न तयार रहेको शाहको भनाइ छ ।

सरकारले भाडामा बसेका मानिसहरुलाई दुई महिनाका लागि घरभाडा, बत्ति तथा पानीको बिल मिनाहा गरेर राहत दिए यसले धेरै जनसंख्या लाभवान्वित हुने तर्क उनको छ ।

उनले भने, ‘अहिले कलकारखानाका लागि कच्चा पदार्थ आइरहेको छैन, ब्याज घटाउँदैमा उनीहरुले पूर्ण रुपमा काम गर्न सक्दैनन् । यस्तो अवस्थामा सबै कामदारलाई काम दिएर तलब दिन सक्छन् ? आर्थिक भनेको देशको आगो अर्थात व्यक्तिको चुल्होसँग सम्बन्धित छ । सबैको चुल्हो बल्ने वातावरण बन्नुपर्छ ।’

यसैगरी अर्का बैंकर्स अर्थात एनएमबी बैंकका कार्यकारी निर्देशक सुनिल केसीले आफूहरुले ऋणीलाई मात्र हेर्न नमिल्ने र निक्षेपकर्तालाई पनि मध्यनजर राखेर सोही अनुसार कदम चाल्नुपर्ने बताए ।

उनले भने, ‘हामीले ऋणीलाई मात्र हेरेर हँुदैन । व्याजकै लागि धेरैजसो निक्षेपकर्ता आउँछन् । उनीहरुलाई पनि हेर्नैपर्ने हुन्छ । ऋणको ब्याज घटाउँदा निक्षेपको पनि ब्याज घटाउनुपर्ने हुन्छ ।’ तथापि राष्ट्र बैंकले निर्देशन जारी गरेको खण्डमा मान्नुको विकल्प नरहेको उनको भनाइ छ ।

Facebook Comments