/अर्थतन्त्रमा लकडाउन र कोरना प्रभाव : धनीको सम्पत्ति घट्छ, गरिबको चुल्हो निभ्छ

अर्थतन्त्रमा लकडाउन र कोरना प्रभाव : धनीको सम्पत्ति घट्छ, गरिबको चुल्हो निभ्छ

 

विश्व अर्थतन्त्रमा जस्तै नेपालको अर्थतन्त्रमा पनि कोरोनाभाइरसका कारण ठूलो असर पुगेको छ । आयातमा निर्भर भएको देश नेपाललाई ‘लक डाउन’ले समस्या निम्याउन सक्छ ।  प्रतिव्यक्ति आय कम भएको नेपाल जस्तो देशलाई अहिले कोरोनाभाइरसको महाव्याधिले निम्त्याएको विश्वव्यापी प्रतिकूल परिस्थितिका कारण आर्थिक विकासको सूचकाङ्कमा माथि जान असहज अवस्था सृजना भएको छ ।

अहिले विश्वमा नै अकल्पनीय र विषम खालको घटना भएको छ, जसको चपेटामा सारा विश्व परेको छ । त्यसैको प्रतिकूल प्रभावले गर्दा यतिखेर विश्व अर्थतन्त्रलाई नै पछि धकेलेको छ । नेपाल त्यसै पनि अल्प विकसित देश हो । समयमा खर्च हुन नसक्ने परम्परा नै छ । क्षमताको विकास गर्न सकेका छैनौँ । सहजकालमा पनि लगानी प्रतिबद्धता आउँथ्यो तर लगानी हँुदैनथ्यो जसले अपेक्षित आर्थिक बृद्धिदर हुने अवस्था थिएन । अहिलेको यस्तो असहज परिस्थितिमा त झन् आर्थिक बृद्धि बढ्ने कुरै भएन ।

अहिलेको परिस्थितीले गरिबी बढाउँछ । यो रोग नियन्त्रणमा आइसकेपछि पनि उच्चवर्गका मानिस मध्यम वर्गमा, मध्यम बर्गका मानिस निम्न वर्गमा झर्ने प्रवल सम्भावना छ । हाम्रा संरचना, पूर्वाधार निर्माण गर्ने काम पनि पछाडि पर्छन् । यसले मानिसको जीवनलाई नोक्सान त पुर्याउँछ नै त्योभन्दा कहालीलाग्दो नोक्सान अर्थतन्त्रमा ल्याउँछ ।

विकसित देशहरुमा नै मर्नेको संख्या बढी छन् । चीनको ऊहानबाट शुरु भएको कोरोनामहाव्याधि यतिखेर चीनमा नियन्त्रण हुँदै गएको छ । तर त्यो अहिले चीन बाहिर चाहिँ झनै कडा रुपमा फैलिँदै गएर कोरोनाको इपिसेन्टर नै अहिले यूरोप भएको छ । विश्वमै मानिसले  धेरै रोजगारी गुमाउने खतरा बढेर गएको छ । यसले बालबच्चा कुपोषणमा पर्छन् । शिक्षा दिक्षा राम्रो दिन नसक्ने अवस्था आउँछ । यसले मानव स्रोतसाधनको विकासमा असर गर्छ । दीगो विकासको लक्ष्य प्रभावित हुनेछन् ।

Facebook Comments