काठमाडौं प्रेस नामक न्युज पोर्टलमा अनधिकृत प्रवेश गरी समाचार डिलिट गरिएको विषय स्वीकार गर्दै सिरानटेकले माफी माग्यो ।

 

 

काठमाडौं प्रेस नामक न्युज पोर्टलमा अनधिकृत प्रवेश गरी समाचार डिलिट गरिएको विषय स्वीकार गर्दै सिरानटेकले माफी मागेको छ । बिहीबार राति सिरानटेकको तर्फबाट सिइओ सुवास शर्माले आफ्नो ट्वीटरमार्फत् प्रेस विज्ञप्ति जारी गर्दै गल्ती भएकामा माफी मागेको हो ।

उसले आफ्नो विज्ञप्तिमा भनेको छ, ‘सम्पादक परियार र सिरान टेक्नोलोजिजको व्यवस्थापनबीच समाचारका विषयमा सम्वाद चलिरहेको बेला गलत सूचनाका कारण सिरान टेक्नोलोजिजको प्राविधिक टिमले न्युजपोर्टलबाट उक्त समाचार हटाइएको छानबिनका क्रममा पाइयो ।’

काठमाडौं प्रेसको वेभसाइटको डेभलपर सिरान टेक्नोलोजिज थियो र सिरान टेक्नोलोजिज एफ वान सफ्टको भगिनी संस्था थियो । एफ वान सफ्टले नै इसेवा, फोन पे, विभिन्न बैङ्कका मोबाइल एप आदि निर्माण गरेको थियो । एफ वान सफ्टका मालिक प्रधानमन्त्रीका सूचनाप्रविधि विज्ञ असगर अली र विश्वास ढकाल हुन् ।

काठमाडौं प्रेसले असगर अली र इसेवासमेतलाई जोडेर चैत १८ गते समाचार लेखेपछि चैत १९ गते नै सिरान टेक्नोलोजिजबाट काठमाडौं प्रेसलाई फोन गरी समाचार हटाउन आग्रह गरिएको सिरान टेककै विज्ञप्तिमा उल्लेख छ । तर काठमाडौं प्रेसले समाचार नहटाएपछि चैत १९ गते बिहान ११ बजेर २२ मिनेट जाँदा सिरान टेक्नोलोजिजले नै समाचार डिलिट गरिदिएको सञ्चारगृहको दाबी थियो ।

यद्यपि समाचार हटाएको वा डिलिट गरेको सम्बन्धमा प्रधानमन्त्रीका सूचना प्रविधिविज्ञ समेत रहेका, सिरानटेक तथा एफ वान सफ्टका मालिक असगर अलीले कुनै प्रतिक्रिया जनाएका थिएनन् । तर बिना छाप र बिना हस्ताक्षर सिरानटेकले जारी गरेको विज्ञप्तिमा भने आफ्नो तर्फबाट नै समाचार डिलिट गरिएको स्वीकार गरेको छ ।

 

Facebook Comments