तीन मुक्तक

महानन्द ढकाल कोहलपुर,

१

सागर जस्तै शान्त रहन पनि सकिदैन
हावा जस्तै चुपचाप वहन पनि सकिँदैन
स्वाभिमानमा जब खेलवाड गर्न खोजिन्छ
सधैं सधैं बुद्ध बनी सहन पनि सकिदैन ।

२

हामीले हाम्रो सान बोकेर हिडेका छौं
जहाँ जान्छौं पहिचान बोकेर हिडेका छौं
शिर नझुकाउनु हामीले सिकेको यत्ति हो
श्रद्धाले पुर्खाको योगदान बोकेर हिडेका छौं ।

३

भाषा नबदलियोस् हाम्रो भेष नबदलियोस्
नेपालीपन नबदलियोस् परिवेश नबदलियोस्
सत्ता अनि संस्कार बदलियोस केही फरक पर्दैन
नेपाली हुनुमै गर्भ छ हामीलाई देश नबदलियोस् ।

बाँके